Colunistas

24/11/2016

Welt Tank Fest Taach - von Solange Hamester Jochann*

Te Welt Tank Fest Taach is en taach fer Hërkot se tanke fer ales was meyer sin un hon.

Tas festlichkheet is tausent yeerich, soo alt wii Hërkot sayn folek im Alte Testament, woo xon imer tas Ërnt Fest kefayert hot.

Hayt tsuu taach paseyert te Tank Fest Taach in fiile natsioone uf te welt un is tan te taach woo ti mënxe fer Hërkot tanke pringe fer ales kuutes un ale seechne woo se im yoer kriit hon.

Ti familye fayre tee taach mit kroos kastronoomix raychtum, mit siise patate, kartofle piree, poowere thorte, epel khuuche, nus thorte ore aner ese woo ti raychtum un ti himlixe seeche representeere.

Im Brasil, hot te Presitënt Gaspar Dutra te Natsionaal Tank Taach inkextelt torich tas Kesets Nº 781, fon 17 akust 1949.
Te Empaixatoer Joaquim Nabuco hot ti sujestsioon kep kehat, wayl eyer sich soo aarich fewunert hat im yoer 1909, wayl eyer tii fayrung kesiin hat in Nova York. Im yoer 1966 hot tas Kesets Nº 5.110, tas Tank Fest am 4º tonerxtaach im noofëmper fext kextelt.
Fer xlus mache, pringe ich noch mool fer aych tas kepeet, fon Michel Quoist:
TANKE XEEN, HËR
Is wunerlich, Hërkot, perfekte ëërem hon Wën soo fiil teformeyert sin!
Mayn perfekte aue, wën soo fiil oone licht sin! Mayn xtim woo singt, wën soo fiil xprooch loos sin! Mayn hënt woo xafe, wën soo fiil petle!
Is wunerlich tsurik hëm khome, wën soo fiil net hon woo hiin.
Is wunerlich liipe, leewe, lache, treeme khëne, Wën soo fiil prile, hase, sich in xlechte treeme wënsle ore xtërwe eep se uf ti welt khome.
Is wunerlich en Hërkot hon fer se klaawe, wën soo fiil khee klaawe hon fer sich traan konsoleere khëne.
Is wunerlich, Hër, iwer ales, soo weenich se ferlange hon un soo fiil fer se tanke!!

Xeene kruus aus Thee Walt.

*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com 



  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2021 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia

Publicidade