Colunistas

20/09/2018

Friilings Tsayt un te Festiwaal Frii Yoer in Strassbourg-Elsass.- von Solange Hamester Johann*

Hier pay uns, im Brasil, keet yets ti Friilings Tsayt aan, am 22 septëmper. Tas sol petayte tas ales frix aus khayme tuut, tas ti tunkelheet un traurichkheet fom winter rom is un ales pliye tuut. Frii Yoer sol aach friiling petayte.

Xon fier yoer hale ich mit im Festiwaal “Mir Rede Platt” in Sarreguemines-Lothringen, woo xon 20 yoer lang paseyert un, xon tswaay yoer, hon tii mich pekhant kemach un aan kep uf em Festiwaal Frii Yoer fon Elsass, tas ich tort aach foerxtelunge mache solt.

Isabelle Schoeppfer Dietrich is ti layteriin fon te kultur fer fier xtaate, un tas yoer hot se mich kans liiplich aan keruuf fer se xpreche uf te Geral fersamlung fon te OLCA-Okanisatsioon fer ti Xprooche un Kultur, was en mechtich kroos eer waar fer mich un fer te Proyekt Hunsrik-Plat Taytx.

Isabeelle is aach ti layteriin fom “Festiwaal Frii Yoer”, was petayt en wunerliche mowimënt fer ale sorte trefunge, feste un festiwaale, woo sich fersamle in en riisiche khalëner fom kanse xtaat Elsass: singer, tanser, poëte, xraywer, theater xpiiler, xuule un leerine mit sayn xiiler, prefektuuras, raatios un TVs un noch ale sorte orkanisatsioone woo mit kultur xafe, samle sich uf fiile plets iwer ti tray moonat fon te Friilings Tsayt.

Pay tëne kept ti Friilings Tsayt fiil mee kewaat, wayl tëne iire winter soo xroo is. Awer, ich wil ayer acht too truf aan ruufe weche tee fereenichung fon itee un aarwate fer ti kultur xtarek hale ore rete.

Unser liipe froynt Sílvio Rockenbach xaft xon soo lange yoore fer soo en khalëner fërtich pringe un tas yeete orkanisatsioon woo mit kultur xaft sich aach too temit khimere sol.

Meyer, fom Proyekt Hunsrik, tuun uns aach xon lang too truf weere. Meyer al, tans krupe, musik Bandas, ratialiste woo mit taytxe prokrame xafe, xuule un leerine, meyer mise uns fersamle in krupe fer xtërker se kewe.

In Europa tuun ti layt sich weere mit hënt un fiis fer yeete kultur uf heepe, tas hayst Patrimônio Imaterial.
En folek woo net sayn foerkhomer un sayn kexichte eere tuut, hot khee futur.
Xeene kruus aus Thee Walt.


*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com 
Audio dieses Kommentars –AHAI bl 04



Comentários

Participe! Aqui sua opinião vale muito.


  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2021 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia

Publicidade