Colunistas

17/10/2019

16. Oktoower – Welts Erneerungs Taach - von Solgande Hamester Johann*

Tii fayrung, woo in 1981 aan kefang hot, kept hayt in mee wii 150 natsioone kefayert als importante taach fer ale layt sensipiliseere fer ti erneerung un leepens mitel situatsioon uf te welt.

An tëm selwiche taach, in 1945, waar ti krintung fon te FAO - Erneerung un Akrikultur Organisation fon te ONU paseyert.
Ti opjektiife fer te Welts Erneerungs Taach tsiye sin:

- ti acht aan ruufe fer ti nootwënichkheet fon te naarungs mitle protuktsioon un xtërkung fon partnerxafte uf meere niiwels;
- alarm mache fer te propleem fom hunger, aarmut un uner erneerung uf te welt;
- xtërkung fon te ekonoomik un tëknike kooperatsioon tswixe natsioone in wakstum;
-forterung fer ti teknologii transferëns fer natsioone in wakstum;
- forterung tas ti mënxe woo in rural aareas leewe tayl nëme an te tesisioons protsese woo influëns hon in iire leepens kontitsioone.

Es kept pextimt tas ti welt pis 2050 iwer noyn milioone mënxe sol hon un ti welt erneerungs protuktsioon mus umkefeyer 60% kextii kewe, tas ti welt wayter naarungs mitel nedetiuchkheete ketekt wëre.

Umkefeyer 820 milioone mënxe iwer ti welt hon in 2018 khee kenuuch neerungs mitel kehat, layt woo hunger mit kemach hon. Tan, hon mer fiil aarwat fer kenuuch ese se protutseere.

Brasil is te tsweet kreeste leepens mitel protutsënt uf em planet, ploos noo Nort Amëërika, un khan, in khorts tsayt, in tëm ranking palt ti eyerxt positsioon in hoole.
Brasil is hayt xon te kreeste exporteur fon tsuker, khafi, ranje saft, rints flayx, xwayne flayx un haane flayx.

Tesweche, mus ti akrikultur uf te kans welt intensiwiert kewe, un Brasil tuut en importante rol too trin xpiile in te neekste yoore fer ti welt; tas hayst solutsioone fine fer ti ferkreeserung fon te plansung aareas un ti protuktiwiteet wayter se ferpesere.

Unser Lant hot imer noch riisiche aareas woo tsum planse penutst kewe khëne, oone walt um haue. Tii un anere faktoore lose en fiil ferxprechent futur fer ti prasilianix akrikultur ap waate.

Xeene kruus aus Thee Walt.


*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com 
Audio dieses Kommentars –AHAI bl 04



Comentários

Participe! Aqui sua opinião vale muito.


  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2021 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia

Publicidade