Colunistas

01/06/2016

05 Yuuni – Umwelts Taach - von Solange Hamester Jochann*

Ti iwerleepung fon te mënxheet uf em Planet Eyert hëngt am klaychkewicht fon te Umwelt un ti rasional penutsung fon te mineraal, planse un tiire.

Ti Stockholmer Konferëns woo ti ONU orkaniseyert hot im Yoer 1972, iwer te theema Umwelt, waar ti eyerst aktsioon woo fersuucht hot ti Umwelt xoone.
Ti Umwelt tuut ale leewente un net leewente tinger umfase, woo uf te Eyert ekisteere un woo ti Ekosysteeme un tas leewe influse. Sin ti kontitsioone un kesetse woo tas leewe in sayn kanse forme xitse, rechiire un meechlich mache.

Ale mënxe mise sich khimere mit te erhalung un tas Umwelt tefenteere.
Tii konsientiseerung mus in te familiye un in te xuul paseere, unser Planet imer mee peser khëne lërne un soo en konsiëns formeere woo ti harmonii tswixe mënxe un natuer mee weyert kept.

Ti Natuer is rasionaal un reweleyert sayn kehëmnise ore segredos fer tii woo lërne tëm sayn xprooch leese un ferxteen.
Weyer wees op meyer net mise fiil mit te Natuer xpreche, tas mer ferxteen was tii uns saan wil?
Xpasich, kël, tas te mënx sich tas kluuchste tier rechent, awer is tas eensichste tier woo ti Natuer fernicht.

Was mer xon wees, is tas in te Natuer tuut sich niks tsiye, niks keet ferloer,ales tuut sich transformeere.
Sokaar te Phaapst Fransiskus khimert sich mit unser "Kemeensam Haus - Unser Planet", un froot: „Was fer sort Welt wole meyer fer ti neekste jeneratsioone lose als erepxaft“?
Preserweyer ti Natuer, meyer mise se aarich neetich hon...
Xeene kruus aus Thee Walt.

*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI und Kolumnistin bei www.brasilalemanha.com.br. E-Mail: equipehunsrik@gmail.com 



Comentários

Participe! Aqui sua opinião vale muito.


  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2021 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia

Publicidade