Te Moters Taach, unich en ferxiitne aue plik - von Solange Hamester Johann*

Moter sin is ti misioon fon te kreest responsapiliteet. Is liipe in te komplët form. Is es peste fon sich selepst kewe un niks tsurik waarte. Awer, hayt wil ich net ploos iwer poesii xpreche.

Ich wil xpreche wii xweyer es is mama sin uf plets woo es xwiirich is naarungs mitel fer sich un sayn khiner samer pringe. Tas is en kans traurich realiteet uf unser Planet, woo sich tas yoer fiil ferxlimert weche te COVID-19 pantemii. Te numer fon mënxe woo in en motereyert ore xweyer leepens mitel sicherheet leewe, sin unklaupliche 2 pilioone layt, was 25% fon te pefolkerung fom Planet sin. Tii mënxe hon khee aksës an sauwere un naarhafte leewens mitel iwer es kanse yoer.

Sokaar in Europa un Nort Amëërika, hot 8% fom folek propleeme mit te leewens mitel sicherheet. Fon te mënxe woo net kenuuch se ese hon, leewe 500 milioone in Aasia un 260 milioone leewe in Aafrika. In Latayn Amëërika un Karibe khomt te numer an 42 milioone mënxe, was petayt tas im kansem mee wii 820 milioone mënxe uf unser planet hunger layte tuun.

-Wëns tuu leepens mitel im xrank host, tsaych fer aan se tsiye, en tach iwer te khop un en plats fer se xloofe, pist tuu raycher wii 75% fon te kanse mënxe fom planet.
-Wëns tuu kelt uf te pank host, in tayn priif thax ore ploos phaar nikle host, keheyerst tuu tsu te raychste 8% mënxe fon te welt.
-Wëns tuu hayt moynt mit mee kesuntheet als krankheet uf kextii pist, pist tuu keseechenter als milioone fon mënxe, woo tii woch net iwerleewe wëre. -Wëns tuu noch nii te kefaar fon en kriich mit kemach host ore noch nii ti xrecklich phayn fom hunger erleept host, hast tuu in tëm momënt mee klik wii 2 pilioone mënxe.
-Wëns tuu tii mensaaj leese ore aan heere khanst, host tuu mee klik wii 800 milioone analfapëte uf te kans welt. Im Brasil sin meyer imer noch 11 milioone analfapëte woo mee wii 15 yoer alt sin.

Ich klaawe tas nimant mee phayn mit macht mit tas ales, wii yeete familye Mama, woo sayn khiner net richtich erneere khan. Ich klaawe tas en moter ti welt peweeche teet fer sich kuut um sayn familye se khimere un tii froo un kesunt siin khëne.

Wayl Moter is te persoon woo imer ti aarme uf macht, wën mer uns wëërme prauche; Is tii woo en hërts hat woo uns ferxteet, wën mer aan keheyert kewe mise; Is tee persoon woo sensiiwle aue hat, woo sich awer xtram mache hhëne, wën mer en lektsioon prauche; Woo kraft un liipe hat, fer uns torich tas leewe se fiire, Un uns flite kewe tuut wën mer fliye wole. Xeene kruus aus Thee Walt.


*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com 
Audio dieses Kommentars –AHAI bl 04