Kapasiteet fer sich atapteere - von Solange Hamester Johann*

Yeete ferënerung pringt naye momënte mit sich, woo komplitsiert un xwiirich sin khëne fer um se keeen. Tesweche, is es nootwënich tas mer unser ataptatsioon kapasiteet peaarwate tuun, wayl te resultaat fon unser aktsioone pextimt was in unser leewe paseere khan im futur.

Wën unser leewe kontitsioone sich keënert hon weche irchent eene motiif, wii yets te Covid-19, mise mer unser ferpintunge xtërke mit froynte un ferwante woo sich in te aktual situatsioon aanpase khëne. Tas is te peste weech, fer kontekstualisiire un te iwerkang un ti aanpasung an en nay realiteet laychter se mache.

Es is important sich aanpase. Meyer khëne net oone en minimum aanpasung tayl sin in en keselxaft, wayl wën mer net te tsu pase, wëre mer fiil xwiirichkheete hon fer kuut se leewe. Tas lërne um keen mit pextimte situatsioone, khan als ewolutsioon aan kekukt kewe, wayl ti welt tuut aus weele fer iwerleewe tii woo es kemach kriin.

Yeete mënx tuut kërn tayl nëme in en krupe, froynte hon fer sayn leewe se tayle. Meyer prauche en tsu keerichkheets kefiil hon. Tesweche is es soo important se lërne sich aanpase, wayl tas important is fer unser kaystlich un psikix kesuntheet.
Meyer mise uns enkajiire. En weech fine fer unser talënte se nutse, fer unser familye, unser froynte un unser kemaynte se helfe. Naye ferpintunge aan xafe un ti alte ferxtërkere is, in tëne ferënerungs tsayte, kans kesunt.

Meyer hon ti aankewoonheet ferklaychunge se mache tswixe tëm alte un naye un normalerwayse is in unser ferklayche tas was pekhant is - tas alte, uf em eyerxte aue plik peser als tas naye – tas was mer noch net khëne.

Ti kapasiteet fom mënx fer sich atapteere is eene fon te kreeste kaape. Soo unkonfortavel wii es sin khan, tuun mer uns imer aan pase. Es xaynt tas mer nii kenuuch an unser kapasiteet klaawe tuun. Wën mer tas klëërer here, teere meyer filaycht uns mit tëne naye momënte mee ferkniiche, mer teere uns tëm naye mee hiin kewe, oone ferklayche mit tsayte fon tefoer.

Ich xpreche net fon akomotatsioont, awer fon ataptatsioon. Te kroose unerxiit is tas net yeete ti kapasiteet hat fer sich aan se pase, awer yeete mënx, tier ore plans in te natuer khan sich atapteere, sonst weyer khee mënx im hayse tesërt lant ore im keayste Nort Phool.

In te tswixe tsayt ... mise mer unser khop ap khiile un fersuuche uns an unser naye kontitsioone traan keweene, tii woo sich hayt uns foer xtele!

Xeene kruus aus Thee Walt.