Fater Taach - von ASolange Hamester Jochan*

FATER TAACH En Fater woo imer presënt is, is wii tas licht woo te pilger fiert iwer sayn lang rees, heleft iim te peste weech aus suuche, piit konfort un wëërmung aan, kept xuts un sicherheet an te xwiirichste momënte fom leewe. Tas licht erkhëne is te kreeste prays ore peloonung woo en fater un sayn khint in sayn leewe kriin khëne.

Fater sin is en kotlich misioon, woo te mënx ticht an sayne Kriator pringt, wayl kenau wii te Heechste Fater, woo uns fiert, mus te fater ti laycht thorem sin im leewe fon sayn khiner un se iwer ti xwiirich rees fon tee eksistëns fiire. Ti khunst fer en papa se sin is aach ti khunst fon yeete taach, is ti khunst fer se lërne wii fixe, fom liipe oone moos un unerxtitsung oone krënse.

Fater sin is mee als noore en rol erfile in te familye un in te keselxaft. Es is, foer alem, te froynt fon aler xtune sin, is imer ticht sin, tepay sin im leewe fon sayn khint. Is kans sicher tas ti pest ërepxaft woo en fater hinerlose khan is en kuute karakter un kraft fer se khëmfe iwer es leewe. Yoo, ti misioon is xweyer un fol khimerung, awer ti peloonung khomt wën tuu an tayn keliiptes khint siin khanst te kexayte mënx woos tuu ketsoo host.

Fiile Tank, Fater, fer tayn froyntlich un tsaatlich presëns an yeete taach fon unser leewe. Tanke xeen, Fater, tas tuu tas licht in unser leewe pist un tas meyer ferxteen khëne wii important es is tas licht se sin im leewe fon mayn khiner. Meyer liipe tich!!!

Xeene kruus aus Thee Walt.

*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com 
Audio dieses Kommentars –AHAI bl 04