Atwënt Krans - von Solange Hamester Johann*

Te Atwënts Krans is te eyerxte sinaal fon te Waynachte. Hayt tsu taach is en kroos pekhimerung fer tii important kewoonheet wayter peleepe mache, woo uns helfe khan tii tsayt kuut mit hale.

In te kexichte fom Atwënts Krans siin mer tas tee krans aus te nortixe ore skantinawixe lëner un nort Taytxlant xtamt, woo uniwersaale simpoolixe wortsle hat: es is en krays fon kriin laup un sayn runt form sympolisiert ti eewichkheet. Sayn kriin farep xteet fer Hofnung un Leewe. Tee is mit en root pant ferputst, was te simpool fom Kotes Liipe uf uns petayt un unser liipe, meyer woo uf es Yeesus Khint waate tuun.

In te mite fom krays kewe ti fier khërtse an yeete Atwënts sontach aan kextoch. Tas khërtse licht sympolisiert unser klaawe un fiert uns tsum kepeet.

Tii simpoole hon sich kans kuut in tas kristliche Waynachts kehëmnis aankepast un too temit sin se laycht in ti kristliche natsioone aankenom kep. Kans xnel hot tas sich in noch en elemënt fer ti kristlich petakojii transformeyert un meyer khëne ti erwartung uf Yeesus aus saan als Licht un Leewe.

Meyer khëne te waare sin fon te Waynachte fayre in unser leewe un in unser familye: Yeesus Khint is unser krooses Kexënk!
Kot is tepay im leewe fon yeete mënx. Un, uf yeete fal, lost Eyer uns sayne Liipe xpiire, un lost uns wise sayne wunx fer uns se rete.

Hër Yeesus, tayn Waynachts Fest fayre petayt unser leewe un unser haus in en plats fon eewichkheet un retung transformeere. Tas tayn Licht in yeete hërts xayne sol. Wën meyer yeete khërts fon tëm Atwënts krans aan xteche, wole meyer aach hofnung, liipe, priiterlichkheet un ti retung aan xteche. Tas is te kroose kexënk woo meyer kewe wole fer al tii woo meyer liipe torich tas Yeesus Khint, tee woo in unser Familye uf ti welt khome tuut.

Un soo wakst in uns te wunx fer pesere mënxe se sin un kept uns ti kapasiteet fer anere mënxe pekeechne keen, solitariteet, hofnung, justis un friite uf te welt am ferprayte…

Xeene kruus aus Thee Walt


*Solange Hamester Johann
ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com  

Audio dieses Kommentars –AHAI bl 04 ab 05/12/2019