Akust – Folkloor Moonat – von Solange Hamester Johann*

Folkloor khan tefiniert kewe als ti wisenxaft fon ale manifestatsioone fon populaare khëntnise, woo fer tas sosiaale un psikolookixe wisen fon en folek als aarich nootwënich aan kesiin kept.

Tas tsaychent ti funtamentaal mooleray fon te kontinuiteet fon yeete natsioon. Te Folkloor tuut yeete mënx tichter pringe an ti kexichte fon sayn folek, an ti kexichte fon sayn lant un kraat soo tichter an sayn aychne kexichte.

Tas petayt tas te mënx sich selepst khëne lërnt un erkhënt sayn historisiteet un mënxlichkheet torich em Folkloor.
Un noch, meyer al wise wii important es is unser Folkloor khëne lërne un penutse ore aan wëne fer unser khëntnise wayter lërne fer ti neekste xeneratsioone.
Unser Folkloor is soo raych, soo fol petaytung un tsaycht soo en kroos tiwersiteet, tas mer tutsente ferxiitne nutsunge meechlich fon tëm mache khëne.

Wën natsionaal itentiteet als en samer rechnung fon kulturaale weyerte interpreteyert kept, tii woo aus erleepunge resulteere, is es kenau soo important tas ti rechiirunge, ti keselxaft un ti profisionaale fon te kulturaal aarea imer acht truf hale an ale rejistre, an was um uns rom paseyert, ti aktiwiteete, ti samlung fon informatsioone, ti kesetse woo te foer xrit mache khëne fon was hayt als Kulturaal Itentiteet fon unser folek ferxtan kewe khan.

Wën meyer unser popular kultur khëne lërne un mit helfe naye prokrame orkaniseere un ferprayte, khëne meyer ti wakstum un xtërkung fon unser Folkloor helfe, was kulturaale ketachtnise fom xermaanixe folek im Brasil ferprayte macht.

Tsaal rayche aktiwiteete fon te foleke sin mit te kulturaale itentiteet fon yeete plats ferpun un im laafe fon te yoore kewe se tayl fon te kultur un folkloor fon yeete natsioon. Ti khëntnise fon yeete folek mise keeert kewe un mise sayne weyert erkhënt kriin. Meyer mise unser folkloor un unser tratitsioone xatse.
Xeene kruus aus Thee Walt.

*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com 
Audio dieses Kommentars –AHAI bl 04