Faters Taach – von Solange Hamester Johann*
Es sin, also, net ploos pluuts ferpintunge, awer aach sentimentale ferflichtunge woo te weyert fon unser familye pextime!
Fater is te persoon woo kraft, sicherheet un xutz inspiriert. En fater sin petayt yemant fiil mee liipe wii mer ferxteen khan, is en phayler sin fer en leewe, en heroe sin woo in lërnt fer wortsle se tsiye un fer se fliye. Fater is te froynt woo imer pay uns is, en khameraate in te auspiltung un en payxpiil in atitutes. Ti petaytung fom Fater taach se fayre is ti xtërkung fon te familyare ferpintunge un te rexpekt fer tii woo uns tas leewe kep hon!
Tas leewe is en wunerlich rees, fol kroos aartiche erleepnise un unferkeslicher momënte, soo wii tas woo se uns lërne un te ketult fon en papa, woo meyer in unser kans leewe mit nëme. Es sin kexichte, es sin erinerunge woo mer nii ferkese wëre.
Tesweche, wil ich phaar kleene kexichtcher fertseele, woo ich mit mayne papa erleept hon un hayt tsu taach mich an sayn tsaatlichkheet mit sayn siwe khiner erinere:
Yeete moynt, als elst tochter, waar mayn aarwat te “khees xmier” aanmënge fer te moynts khafi. Am tix, noo em kepeet, soo lang wii ti mama ti xaype ap kexnit hot fom kroos milye proot woo se im pak oofe kepakt hat, hot te papa imer te khees xmier triwer kexmiert un tëm noo hot eyer siis xmier thupcher truf kemach, un fer yeete fon sayn khiner en kleene thorte ap kep. Too traan khan ich tëm sayn tsaatlichkheet un ketult siin mit sayn siwe kleene khiner, en momënt in te familye am uf weyerte.
Noo em mitach ese, sin ti tswaay kreeste kurii xon kelaaf fer uf te kroose ranje paam krawle un ti xeene fruchte runer xmayse fer uns se kapse un te papa se xeele, tee sich am inpilte wayl tee hat tas mit kexik kemach, ti xaal kans lose, oone se ap xnayte ore ferpreche. Hayt mache meyer tas aach imer noch fer unser khiner.
Eyer waar imer tepay un hot mit kroos acht an unser xuuler ufkaape imer mit kehal, sokaar khiner makasine unertsaychent fer uns kërn leese mache.
Uf tëm lange leewens weech pekechne meyer unerweechs kroos aartiche leerer. Fon phaar fon tëne keen mer ti xrite noo, awer fon tëne al is eene woo mer am mayste liipe. Sayne naame is eenfach un laycht – PAPA. In unser hërts wërt tee imer en important plats hon.
Fer ti Fatere woo, mit liipe un hiinkaape sayn khiner kroos tsiye un too temit mache tas se sich in pesere mënxe transformeere, wole meyer unser mensaaj fon kroose liipe ap kewe.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com
Audio dieses Kommentars –AHAI bl 04
