INTERNATSIONAAL KHINER PUCH TAACH

Te internatsionaale Khiner Puch Taach kept kefayert am 02 april, wayl an tëm taach, in 1805, te xraywer Hans Christian Andersen in Denmark kepoer waar. Teyer khënt iim, er is te autor fom “Eeklich Patche”, “Tas Kleen Meer Meetche”, neewe fiile anere kexichtcher. Er kept mit justis keeert,wayl eyer te eyerxte autor waar, woo khiner kexichte kexrip hot mit en aan pasent xprooch fer ti kleene. En khint woo kefotert kept fer se leese, kept kans sicher en kroos kewachste woo leese tuut, un meyer al wise wii important ti kewoonheet fom leese in fiile aspëkte fon unser leewe is. Tee taach tiint aach fer ti Literatur se ferprayte un temit naye leeser se kewine.
Soo aach te Proyekt Hunsrik-Plat Taytx hat tsayt sayn krintung fer 14 yoer ti khiner un ti yunge als haupste phunkt fon sayn opjektiife kemach, wayl is torich tëne tas ti tratitsioone, te khëntnis un ti kultur fon en folek sich fereewicht fer ti neekste xeneratsioone.
Tesweche hon mer noch mool foer uns orkanisiire fer noch mool mit hale in tray importante Festiwale fon unser moter xprooch in Frankraych un Taytxlant.
1) Festival Friejohr Elsass = fon 09 pis 11april sin mer in
Strassbourg, mit interwiews fer raatio un tsaytunge, un noch em foerxtelug
iwer unser folek hier im Brasil um iwer unser Proyekt. Weyer uns inkelaat hot is ti Kultural Tirektoorin fon te Rechioon Grand-Est = Elsass-Lorrain-
Champagne-Ardennes, Frau Isabel Schoepfer Dietrich;
2) Festival Mir Redde Platt = fon 12 pis 14april sin mer in te xtat
Sarreguemines, woo ti 20ª Etitsioon fon tëm Festival promoweyert kep, woo fiile munisipe fon te rechioon umfast un tepay paseyert ti Puch Mese woo ploos xraywer fon unser moter xprooch mit hale khëne, un autore fon fiile natsioone pay khome. Unser Proyekt halt xon es 4ª mool te ray noo mit uf tëm festiwal, mit unser picher, foerxtelunge, interwiews fer TV prokrame, ratio un tsaytunge, imer fer jornaliste woo mit unser xprooch xafe ore prokrame hon inun ser xprooch
3)Simpósio Bosener Gruppe = fon 01 pis 06maay sin mer in Bosen, Kreis
Skt Wendel, am mit hale uf te 26ª Etitsioon fon tee important fersamlung fer
unser xprooch leewent se hale. Tee Simposium paseyert ploos fer inkelaatne artiste fon te xprooch, imer poëte, xraywer, jornaliste, ratialiste un singer
woo xafe fer unser xeen xprooch leewent hale.
Fer mich en kroose eere tas eyerxte persoon fon te Amëërikas woo inkelaat kept fer tee Simposium mit se hale.
In khorts tsayt, khan ich noch anere naychkheete fer aych fertseele.
Halt aych munter,
Xeene Kruus aus Thee Walt.

Deixe um comentário

O seu endereço de e-mail não será publicado.