Colunistas

24/05/2018

Xtet im Saarland, von wo Foerfaarer khom sin - von Solange Hamester Johann*

Ich wil fer aych fertseele soo mechtiche emotsionante kexichte woo mich paseyert sin im Saarland, xtaat kraat unich em Hunsrück, in Taytxlant.

In oktoower 2017 hon ich te Histooriker un Genealogist KLAUS LAUCK khëne kelërnt, woo aach “Cônsul Honorário” fom Xtaat Saarland-DE fer Santa Catarina un Rio Grande do Sul is, uf te khërep hier in São Vendelino-RS.

Too saat ich tëm ich teet in april noo Taytxlant reese. Tan antwort eyer tas, wën ich noo em Saarland kheemt, teet eyer selepst mich hiin faare uf ti xtet woo ich khëne wolt. Un, wii ich mayn rees am orkaniseere waar, saat ich tëm was fer xtet un mayn inwanerer familye woo fon tëm xtaat khom waare.

Ich waar uf te Puch Mese in Sarreguemines-FR un eyer is tort aach ti plat autoore khëne khom un fer mich ap hoole un mit nëme pis Scheuern, ticht an Skt.Wendel, woo ich ti neekste tray taache rom pringe teet in te “Wanderoase” – en kleene hotel fon te ewankeelix khërich. Ich waar kans froyntlich petiint kep fom prefekt fon Bohnenthal. Tee hot tray moynte mich te khafi uf ketixt. Tas hot mich soo aarich ferwunert, tan hon ich tëm kefroot: - Wëns tuu xon 25 yoer te prefekt pist, warom pist tuu hier fer mich te khafi am mache¿ - Ich mache tas als fraywilich aarwat fer mayn khërich!!! Meyer hon es letste yoer neekst 900 persoone hier uf kenom.

Moontachs, hat Klaus Lauck fer mich en important pesuuch pextimt kehat in te xtat Freisen, woo te Prefekt fon te Familye Alles is. Tee hot uns uf te haupst ek fon te xtat ap kewaat, hot uns uf te friithoof kefiert un ich hon tutsente pilter kemach fon krewer fon ferxtorepne “Alles”. Tëm noo hot eyer uns pis an sayn mama sayn haus kefiert. Tort hon umkefeyer tseen persoone fon te “Familye Alles” mich aarich froyntlich un liiplich uf kenom, mit en riisiche un fayne mitachs khafi – hate sokaar ekstra en khees khuuche kepakt kehat. In te xtup, uf em tix, hate se fiile pilter un tokumënte. Ich hon ti torich kepletert un klaych must ich hat aanfange se prile!!! Tan sin se al tichter khom un frooe mich was too weyer… Tan hon ich te finger uf en kans alt kelep pilt kextrekt un saat tëne: “Te orikinaal fon tëm pilt is in mayn haus!!!”
Yoo, saate se, meyer hon tas pilt frier fom Brasil kexikt kriit!!!

Meyer hon uns al umkeaaremt un al mitsamer keprilt fon emotsioon, wayl tas waar
ti pewaysung tas meyer ferwante sin. Un too hon se mich en last kexënke un pilter
kep, woo ich mit keprung hon fer unser ferwante hier.

Tan hon se mich an en nachpaarx haus kefiert, woo em prefekt sayn xwester noch
woont: fon tëm haus waare unser ferwante aus kewanert kewees.

Tsayt tas ich tas erleept hon, hon ich in te ketanke tas fer aych se fertseele, wayl tas
waar soo en mechtich xtarek un wunerlich emotsioon tii ferpintung iwer meer se
fine!!!
Froyntliche un liipliche kruus aus Thee Walt!

*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com 



Comentários

deslogado
RouterLogin 29/05/2018, às 04:48

Thank you for sharing the good and useful information Router Login not working routerlogin admin page Routerlogin Routerlogin Net

deslogado
skype for web 26/05/2018, às 09:54

If you want to use skype for web, all you need is an active internet connection and a well-supported Web browser

deslogado
tips2018 26/05/2018, às 03:41

You can see the best funny wifi names on techola.


  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2020 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia

Publicidade