Colunistas

06/10/2016

Woo heyer khomt te Hayliche Fransi von Asis Taach - von Solange Hamester Johann

Hayt tsuu taach is moote sich mit te tiire khimere. Awer, meyer hon en xeene payxpiil fon yemant woo tas xon kemach hot lang tsayt tsurik: tas waar Hayliche Fransiskus fon Asis. Frans waar kepoer in Asis, Itaalya, im yoer 1182.

Te taach fom Hayliche Frans fon Asis kept kefayert yeetes yoer am 4º oktoower, taach woo eyer kextorep is in 1226, mit 44 yoer. Tswaay yoer tëm noo is er fom Phaapst Gregor IX haylich aan kesaat kep.

St. Fransiskus fon Asis is te xuts patroon fon te tiire un fon te Natuer. Is aach als te Hayliche fon te aarme pekhant.
Fransiskus un sayn aanhënger sin uf fiile xtet in Europa un Afrika kereest, wii Ejypt, Chipre, Room, Siirya un anere hayliche plets.
Hayliche Fransiskus saat:

“Fang aan se mache was neetich is, tëm noo mach was meechlich is un, uf mool, wërst tuu tas unmeechliche am mache sin”. Tëm sayne liipe fer ti Natuer un ales was te tsuu keheyert, waar imëns. Franz fon Asis hot sich hiin keopfert fer ti lëpra kranke, un fer ti tiire un ti Umwelt. KEPEET FON HAYLICHE FRANSISKUS FON ASIS:

Hër, Mach fon mich en instrumënt fon tayne Friite! Woo has is, mach tas ich hiin nëme te Liipe; Woo pelaytichung is, tas ich hiin nëme ti Fertsayung; Woo uneenichkheet is, tas ich hiin nëme ti Eenichkheet; Woo tswayfel is, tas ich hiin nëme te Klaawe; Woo te feeler is, tas ich hiin nëme ti Woerheet; Woo ti hofnungsloos is, tas ich hiin nëme ti Hofnung; Woo traurichkheet is, tas ich hiin nëme ti Frayt; Woo ti tunkelheet is, tas ich hiin nëme tas Licht! Ooh, Mayster mach tas ich mee fersuuche Konsoleere als konsoleyert kewe Ferxteen als ferxtan kewe Liipe als keliipt kewe Wayl is wën mer was kept woo mer was kriit Am fertsaye, kewe meyer fertsayt un Is am xtërwe woo mer leept fer tas eewiche leewe!”
Xeene kruus aus Thee Walt.


*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com 



Comentários

Participe! Aqui sua opinião vale muito.


  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2019 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia

Publicidade