Colunistas

12/06/2019

Trefung mit Sociedade Bíblica do Brasil - von Solange Hamester Johann*

Am letste 07 yuuni hate meyer en aarich protuktiif trefung mit importante pesuucher:

fon S.Paulo, Hër Paulo Teixeira, Sekreteyer fer Iwersetgsunge un
puplikatsioone fon te SBB fer te kanse Brasil; fon Curitiba, Hër Vinícius Lacerda,
rechional sekreteyer fer ti tray siit xtaate un, fon S.Leopoldo, Prof.Dr.Vilson Scholz,
Konsultant fer Iwersetsunge woo uns xon heleft un khurse fer uns kept tsayt 2007,
un tee tuut aach noch unser piipel iwersetsunge imer korijiire.

Meyer hon xon fiile khurse mit tëne kemach als treiniirung fer ti iwersetsung in te
kumputer setse, tas tas xon fërtich playpt fer se truke, in en importante prokram woo
ti meyerxte piipel iwersetser fon te kans welt penutse;

Tii sin uns pesuuche khom ekstra tas meyer mitsamer pleen mache khënte fer unser
aarwat fer ti neekste yoore wayter xafe, tas tas pupliteseyert kewe sol.
Meyer hon xon phaar khiner picher puplitseyert kriit – ti Piiplixe Awentuure I un II,
tas letste yets in feepruer fer unser 15 yoer keportstaach mit uns se fayre;

Meyer hon aach 262 Kanoonixe Thekste iwersets un xon puplitseyert in te Internet,
was fier thekste ti woch fer en kans yoer kept, tas ti farer un phaater tii als xon
penutse khëne in sayn khëriche;

Meyer hon fiile Puch Mese ore Feiras do Livro xon mitsamer mit kemach, un noch
anere festlichkheete woo unser xprooch tayl nëme khont wayl ti meyerxte layt unser
taytx xpreche; hon aach mitsamer picher aus ketaylt fer fiile munisipaale secretarias
de educação - woo tii fertaylt hon fer sayn xuule, un noch fiile anere aktiwiteete,
was fon te SBB unser importantest partnerxaft macht.

Soo, is tan pextimt kep tas noch noye picher puplitseyert kewe sole. Tsum payxpiil:
- ti 262 Kanoonixe Thekste – tswaay xproochich portukeesix / hunsrik, in Papier
Puch;

- en puch iwer “mënxliche weyerte”, woo xon fer xuule fertaylt kep torich ti SBB,
woo meyer yets aach tswaayxproochich puplitseyert kriin;

- ti Piiplixe Awentuure III – noch mool fer ti khiner;
- en khiner pichelche “Mayn Liip Piipelche”, woo meyer xon iwersetst hon;
- ti fier Ewankeeliume fon Lukas, Yohan, Mateus un Markus, in en piipel “Naye
Testamënt”, was finef naye picher fer uns kept in khorts tsayt.

Meyer sin kans froo tas Hërkot unser aarwat imer wayter am seechne is mit kuute
naychkheete un mit foran xrite in te xprooch fer unser xermaanix folek.
Xeene kruus aus Thee Walt.






Comentários

Participe! Aqui sua opinião vale muito.


  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2019 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia

Publicidade