Colunistas

08/09/2016

TI CTGs - von Solange Hamester Johann*

Mit 1.731 CTGs (Centros de Tradições Gaúchas) in 497 Munisipe fom Rio Grande do Sul, was umkefeyer 3,5 CTGs fer yeete munisip kept, is te Rio Grande do Sul, sicher, te xtaat mit mee entiteete woo ti kultur un kewoonheete fon te Gauchos fleeche.

Awer, tënk net tas es ploos iwer ti Siit xtaate fom Brasil is, woo es ti CTGs kept. Aus em Rio Grande do Sul kept es 1.103entiteete in 23 Xtaate fertaylt, was 38% sin fon te kanse 2.834 CTGs im kanse Brasil.

Te nachpar xtaat Santa Catarina is te tswete im rang tswixe te xtaate mit mee CTGs im Lant, mit 601 entiteete,un klaych tëm noo Paraná, mit 336, ploos ketseelt tii woo inkexrip sin in te Confederação Brasileira da Tradição Gaúcha (CBTG) un im Movimento Tradicionalista Gaúcho (MTG). Tan khomt Mato Grosso mit 43, Rondônia mit 33, São Paulo mit 28, Mato Grosso do Sul mit 19, usw.

Ti Gaúcho Tratitsioone Sentrums = CTGs, sin sivil ferayne woo ti tratitsioone un folkloor fon te Gaucho-Kultur ferprayte, soo wii se kotifiseyert un rejistreyert kep waare torich erkhënte folkloriste fom mowimënt.

Ti fleeche ti Kultur un kewoonheete fom Rio Grande do Sul im Brasil torich asosiatiife un fray tsayt aktiwiteete , kefiert mit te selwiche kruntsatse un reechle, ferxtraut iwer te kanse Brasil.

"Uf yeete potem - imer Gaucho": tee haupt phunkt woo im eyerxte CTG ketsoo kep is, im yoer 1948 playpt imer noch hayt keeert pay te Gauchos un Prendas woo tayl nëme in tëm Mowimënt.

Te opjektiif is ti sosiaal intekratsioon fon tëne woo too trin tayl nëme - ti tratitsionaliste, fer ti retung un erhalung fon te gaúchos kewoonheete torich em tanse, xurasko un anere kulturaale ërepxafte.

Ti Farroupilha Woch kept kefayert aus em Rio Grande do Sul – im kanse Brasil, mit tëm selwiche xtols woo meyer hier tas aach selepst fayre."
Xeene kruus aus Thee Walt.


*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com  



Comentários

Participe! Aqui sua opinião vale muito.


  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2020 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia

Publicidade