Colunistas

06/01/2016

Sich iwerlëye iwer tas Leewe - von Solange Hamester Johann*

Tas pëste kefiil im Leewe is tsurik kuke un sich xtols fiile. Is yeete momënt leewe un ti kliklichkheet uf paue too hier un yëts. Natierlich pasëyert manich mool tings woo uns nët kefalt..

Te khuuche wakst nët, te pneu fom auto këp lëyer, es reent tsuu fiil ...

Awer, tënk mool noo: Is es nët khoomix leewe oone sich ferlache weenichstens en mool am taach? Hot tas sin te taach fersaue wëche en tiskusioon?
Ich wil kuut leewe ... Un tuu? Tas ferkangne yoer waar en kans fol yoer. Es waar fol kuut tings, awer aach propleeme. Normaal ... Manich mool tuun mer tsuu fiil waate.

Tas këlt is nët khom, te froynt waar nët pay uns, en liipe is ans ën khom. Normaal ... Tas Nay Yoer wërt anerxter. Ënert tas yoerhunert, te yoertausent wëchselt, awer te mënx is nët përfëkt, ti Natuer hot sayn perseenlichkkeet, woo nët imer is was mëyer wole, awer was khan mer mache ? Tayne taache fersaue? Tayne kuute laun fersaue? Tayn hofnung?

Was mëyer winxe fer uns al is Wisheet. Tas mëyer al wise khëne ales in en kuut erleepung transformeere. Unser wunx realisiert sich nët? Kuut ... Es waar noch nët an te tsayt, es waar nët tas pëste fer tee momënt.

Te xlisel fer ti ferxtantnis un en anere siims mit en frixe aue plik iwer unsere neekste, is ti wëlt aan kuke mit en waaych hërts, un ti wëlt khan soo ferënert këwe.
Ich winxe aych al, tee naye aue plik! Tas Nay Yoer khan en aarich kuut Yoer këwe, wën unser aue plik anërxter is. Es khan wërklich hërlich këwe wën mëyer unser xwachheet ferxteen , unser ëkoismus, un uns ferpësere wole. Awer, mëyer kkëne uns paynaner ferxteeen. Tas hëngt ploos an uns sëlepst!
Klikliches Nay Yoer.

*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI und Kolumnistin bei www.brasilalemanha.com.br. E-Mail: equipehunsrik@gmail.com 



Comentários

Participe! Aqui sua opinião vale muito.


  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2020 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia