Colunistas

09/03/2016

Rees noo Sarregemines un Europa - von Solange Hamester Johann*

Meyer sin aarich fiil am xafe fer ales thup lose fer unser rees noo Europa. Meyer xtaye am 17 mërts in un khome am 04 april tsurik.

Iwer weech, hon mer fiil aarwat se tuun, untseelpaar froynte se trefe un en last
wunerliche xeene plets fer pesuuche.

Fom 11/mërts pis 02/april paseyert de 18º FESTIVAL MIR REDDE PLATT,
in Sarreguemines/Frankraych un meyer hale mit fom 22/mërts pis am ën.
Tii ausxtëlung woo tëne iire Centro de Cultura orkaniseyert hot, hon meyer aach
keholef pleene un materiaal riwer kexikt, wii pilter, thekste un kexichte.

Am 22 mërts hon mer en foerxtëlung se mache uf tëm festiwaal. Unser froynt Josef
Peil, woo in Masterhausen-Deutschlant woont, macht tas eyerxt tayl, wën tee xprëcht
warom unser foerkhomer fon tort auskewanert sin. Un ich mache tas tswete tayl, wën
ich fertseele sol was unser xermaanix folek hii im Brasil fërtich keprung hot. Un
tswixe trin, sole ich un tee aach noch poesii fer ti layt pringe. Hon xon phaar fërtich
kemach un sin noch anere famoose am iwersetse, tas mer net in ti klëm khome.
Am 23 mërts mitachs, wërt en ausxtelung kemach in te nachparxtat Forbach, un
nachts noch mool in Sarreguemines, awer uf tëne xprëche meyer iwer unser Proyekt
Hunsrik un unser folek hayt tsuu taach.

Fom 29/mërts pis 01/april, hon mer phaar trefunge mit te prëse, torich tsaytunge,
TVs un Raatio Xtatsioone, sokaar mit unser froyntin Jornalist Suzanne Wachs, in
Dillingen, woo en Prokmram in Hunsrik/Plat Taytx mache tuut im Raatio un TV.
02/april is, fer uns, te haupste taach fom kanse prokram fom festiwaal, wayl tan
khome layt fon fiile plëts un natsioone uf ti Puch Mese ore Feira do Livro: too khëne
ploos ausxtele layt woo in Hunsrik xraywe, ore poesii mache, ore mit te xprooch xafe
in sayn aarwate, wii leerer, ratialiste un jornaliste.

Tas is soo wunerlich, soo emosionant, tas mich yets xon ti treene runer fale, ploos am erinere ti fiile kuute
mënxe woo ich foriches yoer aanketrof hon un woo tas yoer noch mool uns tort trefe
khome. Hon xon tutsente termiine apkemach mit froynte, xraywer, leerer, histooriker,
kenealojiste, tas mer uns xon foer raus fraye tuun iwich soo froyntlich un liipliche
momënte. Hofe tas in te neekste woche tas ales fer aych richtich fertseele khan.
Xeene kruus aus Thee Walt.

*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI und Kolumnistin bei www.brasilalemanha.com.br. E-Mail: equipehunsrik@gmail.com 



Comentários

Participe! Aqui sua opinião vale muito.


  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2019 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia

Publicidade