Colunistas

20/04/2016

Puch Mese am 02. April 2016 in Sarreguemines, Frankraych - von Solange Hamester Jochann*:

Fiile importante layt sin uns uf suuche khom an tee Puch Mese, unser importanteste momënt fon unser Rees:

1) Unser Stand waar hooch keert torich ti important pesuuch fon te Vice-Presitënt fom Rechional Kultur Konseel in te xtaate Elsas-Champagne-Ardenne-Lothringen, in Frankraych, Frau Nicole Muller-Becker. Sii waar aarich intereseyert am Proyekt Hunsrik/Plat Taytx un am Memorial fon te Arkitektur un hot uns kans lang tsayt aan keheyert un hot unser pichelcher iwer ti xtaat kesets ferlangt.

2) GAY UN GRIS is en kroose krupe woo aach khëmpft fer unser moter xprooch leewent hale. Tii promoweere ti puplitseerung fon picher fon fiile autoore in unser xprooch, in Elsas un Lothringen, xtaate fon Frankraych woo tswaayxproochich sin, wayl se aach Plat Taytx xprëche. Ti hale aach xtarek mit in te mowimënte fon te minterhayte xprooche fon te União Europeia. Sin xon unser froynte tsayt foriches yoer.

3) Ti liip un tsaatlich froyntin Hannah Lang, aach en xraywer un poet in te Plat Taytx Xprooch hot uns noch mool tas yoer sayn noy puch kexënket "Wunder Wege Leben", un hot "ales kuutes uf unser weeche" kewinxt in sayne autokraf . Sii un sayne man hon pay uns mit kehal uf te "Tiskusioon Raat" am 23 mërts, woo ti Asosiasioon fer ti Forterung fon te Taswaayxproochikheet orkaniseyert hot un tëm noo, am nachts ese im Restaurant/Musee des Faiançes.

4) Unser peste tank fer ti manxaft fon te Mediathèque (Pipliotëk un anere Miitias) fon Sarreguemines, woo uns ufkenom hot iwer ti 13 taache woo meyer in tee xtat keplip sin:
*a. fer Bertrand Hiegel, xëf fom team, woo unser trefunge prepareyert hot mit fiile entiteete un in tëne al mit kehal hot;
*b. fer Susanne und Françoise, unmiitlich in uns kuut petiine un unser aarwat protuktiif mache:
- Susanne halt xuul, yeete woch, fer leerine fon te rechioon fer ti Plat Xprooch insetse in te xuule un ti Plat Xprooch leewent hale;
- Françoise koorteneyert en xprooch xtuutium krupe “Xrayp Xtup” woo yeete samstach in te Pipliotëk sich samelt fer unser xprooch xtuteere. Macht en thematix puch yeetes yoer iwer te Festiwaal “Mir Redde Plat”, fer ti xrift fom Plat Taytx ferprayte. Tas yoer hot sii te thema "Klaytung" auskesuucht, un macht noch tepay en ferklaychnis im aart wii meere nachpaar rechioone tii wërter ausxprëche.

UN WËN MEYER TII KUUTE SUJESTIOONE AAN NËME TEERE???

Xeene kruus aus Thee Walt - Santa Maria do Herval, RS


*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com 



Comentários

Participe! Aqui sua opinião vale muito.


  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2020 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia