Colunistas

19/01/2017

Picher seye (semear livros) - von Solange Hamester Jochann*

Olavo Bilac hot kexrip:
“Keseechent tee woo seet…
Picher… Picher mit fole hënt!
Un xikt tas folek tënke!
Tas puch woo in ti seel felt
Is en khaym… woo ti phalm macht…

Is te reen… woo tas meer macht!!!
Mit tëm ketanke im sin, sin meyer - fom Proyekt Hunsrik, kans froo, wayl unser opjektiif fer tas yoer noch mool en puch aus kewe is xon neekst inkehool kep.
Is uf kank tas puch “Mayn Liipste Kexichtcher II”, mit tswelef pekhante kexichte un faaple fon te uniwersal khiner literatur, woo tswelef leerine fon Estância Velha iwersetst hon; Cleiton Schneck Kasper - fom Herval tuut tas puch noch mool ilustreere un meyer, fom Proyekt Hunsrik, tuun tas puch orkaniseere, korijiire, unerxtitsung suuche un truke lose.

Soo, sol tas puch en aarwat sin woo wayter xaft ti itee tas ti khiner ti xprooch wayter pehale un tëm weyert kewe, un noch, tas ti kroos kewakste layt aach se wise kriin tas unser xprooch important is fer unser kultur leewent hale un tas net aus xtërwe lose.

Fer ti leerine in te xuule mit tëne khiner picher xafe is aach important, als titaktik-petakooxik material, fer ti weyerte fon te mënxheet aach peaarwate, tas unser khiner wayter lërne was richtich un kexayt is ore net.

Fer ti kultur fon unser xeen Hunsrik-Plat Taytx xprooch, woo xon tsayt 1.500 yoer eksisteyert un rejistreyert is in te friirixe tokumënte un picher, is tas noch importanter, fer se pewayse tas ti xprooch sich leewent halt un unser kultur sich wayter fest xtele tuut hier in Latiin Amëërika un Europa, woo aach fiile krupe un persoone wayter in unser xprooch am xraywe sin.

Tesweche, am ën mërts, tuun meyer uns noch mool trëfe mit tëne krupe un importante xraywer fon Europa im “19.FESTIVAL MIR REDDE PLATT”, in Sarreguemines-Frankraych, fer se pleene iwer te futur fon unser xprooch
un unser xermaanix kultur un unser noy puch uf te Puch Mese presenteere woo tee Festiwal mit koltne xlisel imer tsuu macht. Layt fon fiile natsioone woo unser xprooch xpreche trefe sich too un tuun mitsamer xafe. Tas is was wunerliches un emotsionant.
Xeene kruus aus Thee Walt.


*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com 




Comentários

Participe! Aqui sua opinião vale muito.


  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2019 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia

Publicidade