Colunistas

12/10/2018

Leerer sin - von Solange Hamester Johann*

En misioon ore en opfer? En akt fon liipe ore en leep yeete taach kaput mache? Unich tëne khortse frases kept tefiniert was es petayt en leerer hayt se sin im Brasil.

Te peruuf woo soo en kroose rol xpiilt fer ti entwiklung fon yeete mënx un fon te keselxaft, is am layte unich em kleene weyert fom loon un kleene weyert fom persoon woo leerer is.

Weyer is leerer un woo xaft tee? Informatsioone aus te Xuul Tseelung tsayche tas Brasil 2 milioone krunt xuul leerer hot, ti meyerxte - 77% xafe in te puplik xuul sisteem un 84% xafe in te xtet. Te peruuf is imer noch fon te fraae, mit 8 leerine fon yeete 10.

Te torich xnit fon te elter fon tëne profisionaale is an 40 yoer, un umkefeyer 400.000 - 20%, sin iwer 50 yoer alt, was petayt tas tii palt aus te xuul klase khome.
Soo fiil leerer feele khan erklëërkt kewe torich ti apweyertung fon te profisioon. Leerer mit hooche xtuutium fertiine fiil weenicher im Brasil als anere profisoone mit tëm selwiche xuul niiwel.

Too triwer, kept tii profisioon net mee wii tefoer erkhënt: ti xuule piite khee kuute aarwats kontitsioone aan un te rexpekt fon te khiner un eltre is feloer kang, un aach ti pewunerung fon te keselxaft fer ti petakooke.

Tesweche is tee peruuf fon te leerer unaktraktiif un noore 2% fon te xutënte fom Mëëtium wole Petakoojii xtuteere, saat te MEC. Imer weenicher yunge mënxe wole leerer kewe im Brasil.

Tas is en peruuf woo phayn pringt un krank macht. Tsu te aspëkte woo tii xlechte aarwats kontitsioone fer leerer aus mache, keheyert ti kewaltichkheet woo se mit mache mise in te xuule. Brasil xteet uf em eyerxte plats fon 34 natsioone in akresioon keeche leerer.

Te leerer soo pang mache, tepay keteseelt mit anere propleeme wii tsuu fiile xtune xafe in xlecht infraxtruktur in te xuule fiert hiin tas fiile petakooke uner unruu un xtres leewe. Te numer fon leerer woo ferlange wech playwe fon sayn aarwats plats weche kesuntheet is xreklich hooch un macht soriche.

Was motiweyert un realiseyert te leerer foer soo fiile forterunge? En leerer sin is mit helfe fer te wakstum fon anere mënxe un fer te ufpau fom futur.
Is in konstante kontakt mit anere playwe un yeete taach mit tëne lërne. Is ferpintunge fon fertraung un tsaatlichkheet tsiye un tas leewe fon khiner, yunge un kroos kewakste layt markeere. En leerer tuut an perseenliche, kolektiife, sosiale un kulturaale transformatsioone tayl nëme.

En Leerer sin, im echte sin fom wort, is en kroos aartich misioon!
Xeene kruus aus Thee Walt.


*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com 
Audio dieses Kommentars –AHAI bl 04



Comentários

Participe! Aqui sua opinião vale muito.


  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2018 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia