Colunistas

01/08/2019

Kultural Ërepxaft: was is tas? - von Solange Hamester Johann*

Im Folkloor Moonat, wole mer iwer Kultural Ërepxaft xpreche.

Tas wort ërepxaft kept penutst wën mer uns uf ti aychentum ore raychtum fon en person, en familye, en firma nëne. Ti itee un kefiil fon kolektiif aychentum hot aankefang sin se mache mit te Franseesix Rewolutsioon am ën fom 18. yoer hunert.

Ërepxaft is ales was mer tsiye, weyert kewe un preserweere wole: monumënte, khunst aarwate, feste, liiter un tanse, tas ese un kastronomii, was mer wise un tuun un was mer xpreche un xraywe. Ales was mer mit unser hënt un mit unser itee protutseere.
Ti kultural ërepxaft khan tëm noo sayn materiale ore imateriale natuer klasifitsiert kewe:

Etwas kept als Material Ërepxaft kenënt wën tas puplike interese hat fer preserweyert se kewe, entweeter als histoorixe weyert ore auserkeweenliche arkeolookixe ore etnokrafixe ore noch pipliokrafixe ore artistike weyert hot.

Imaterial Ërepxaft kept fon te UNESCO tefiniert als ti praktike, representatsioone, austrike, khëntnise un tëknike - mit te instrumënte, opjëkte, artefakte un kulturale plets, woo temit ferpint sin - woo ti kemaynte, krupe ore persoone erkhëne als tayl fon sayn kultural ërepxaft.

Ti kultural ërepxaft fon en keselxaft ore kemaynte is aach frucht fon etwas auskesuuchtes, was kemach kept ap fon was ti mënxe als importanteste fine, representatiwste fer sayn itentiteet, sayn kexichte, sayn kultur, tas hayst, ti weyerte, ti petaytunge woo ti mënxe kewe fer opjëkte, plets ore kulturale praktike, woo tas in en kolektiif ërepxaft transformeyert.

Tesweche, is unser xeen xprooch aach en raych imaterial kultural ërepxaft, wayl tii xon 1.500 yoer unser folek tiint un samer halt, soo fiil khëntnise pis hayt tsuu taach uns keprung hot, was unser folek sayn itentiteet erhale tuut.
Xeene kruus aus Thee Walt.

*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com 
Audio dieses Kommentars –AHAI bl 04



Comentários

Participe! Aqui sua opinião vale muito.


  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2019 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia

Publicidade