Kommentar Hunsrik 1181: Unser Sprooch un unser Proyekt in Europa - von Solange Hamester Johann*

Haloo, hier is Solange Hamester Johann, fom Proyekt Hunsrik

Iwer te april moonat tuun meyer es trite mool noo Europa reese fer te PROYEKT HUNSRIK uf te “ FESTIVAL MIR REEDDE PLATT" hiin nëme, in Sarreguemines, Frankraych, un uf ti Puch Mese am 01april, woo mit en koltne xlisel tee Festiwal xliist, wayl too fersamle sich ploos autoore, puplikatsioone un orkanisatsioone fon fiile plets woo mit unser Moter Xprooch xafe

Tas yoer, hot te Promotor fom Festiwal, te Sarreguemines Kultur Centre fom Xtaat Lothringen in Frankraych en partnerxaft kemach fer tee Festiwaal inrichte mit te OLCA-entiteet fom Xaat Elsass-Frankraych, woo wii unser Proyekt Hunsrik, tuut aach fiil xafe fer unser xprooch preserweere, woo en weyert fol ërepxaft is fon unser folek, xon 1.500 yoer alt. Tesweche khome ich aach aan am 29. Mërts moynts in STRASBURG-haupt xtat fon Elsass un ti haupt xtat fon te Europeyx Unioon, fer en Prëse Konferëns, mit TV, Tsaytunge un Raatio xtatsioone.

Noo mitach, tuun ich mit hale in te Diskusioone iwer Propleeme un solusioone fer ti preserweerung fon unser xprooch in te fiile Lëner woo se kexproche kept.
Unser xprooch is kenënt ti “iwer krënse xprooch” fon te xermaanix Europa.

In tëne trefunge tuun ich te BRASIL representeere, un sol unser aarwat foer xtele – ales was te Proyekt Hunsrik-Plat Taytx fërtich keprung hot in tëne 13 yoer eksistëns tsayt feepruer 2004.

Am 08april, tuun ich aach an te Uniwersiteet Wien, in Eesteraych en Foertraach mache uf en Linkwistik Seminaar, te Hunsrik Projekt un ti layt woo Hunsrik-Plat Tatx xpreche im Brasil presenteere, foer alem iwer unser importante paytraach fer en klaychmeesich form fer se xraywe xpreche.

Un, tsum xlus, tuun ich em presenteerung mache in te xtat BUCH, uf em Hunsrück, fon woo ti inwanerer khom sin noo em Bucherberg –Thee Walt (ore Bugerberg - Santa Maria do Herval) fon woo soo fiile familye aus kewanert sin un te kanse Brasil, Argentiinye un Paraguay pewoont hon un filaycht hayt uns mit ferlange aan heere tuun torich tëm xeene Prokram AHAI.

Ti layt triwe kewe imer aarich froo wën mer riwer khome un kexichte fertseele iwich tëne iire nookhomer. Tan, wën mer tsurik khome, tuun mer aych ales fertseele wii tas tort paseyert is.

Xeene kruus aus Thee Walt.


*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com