Colunistas

02/03/2016

Kexichte von te Fraae Internatsional - von Solange Hamester Johann*

Ti kexichte fon te Fraae is ti unersuchung fon te rol woo se kexpiilt hon in te histoorixe kexichte fon te mënxheet.

Tas umfast te xtuutium fom wakstum fon te rechte fon te fraae im laufe fon te wëlts kexichte, ti unersuuchung fon fraae krupe mit intiwituaal importans un was fer petaytung ti histoorixe erleepnise kehat hon iwich ti fraae.

Im xtuutium fon te fraae sayn kexichte kepts te klaawe, tas ti tokumënte fon te tratitsionaale kexichte minimiseere ore iknoreere ti paytraache fon te fraae un te efekt woo sii uf ti fraae als kanses hate.

Ti haupste xtuutium sentre sin in North Amëërika un Ënglant, woo ti histooriker ti aarte un wisentxafte fiire, kefortert un inkeflust torich noye aansatse fon te sosiaal kexichte.
In tiskusioon un analyse fon te unertrickung un unklaychheet woo ti fraae erleept hon, klauwe se tas es neetich waar iwer tas leewe fon iire foerfaare lërne – un hon weenich ketrukte xtuutie kefun. Ti wëlts kexichte sin kexrip kep fon te mëner un iwer ti aktiwiteete fon mëner - krieg, politik, tiplomasii un atministratsioon.

Fraae kewe oft neewe kelos un, wën se aankesaat sin, kewe oftens apkepilt in stereotypixe fikuure als ehefraae , motere ore tochtere. Te xtuutium fon te kexichte wërt kelaat mit weyerte fon tëm was histoorix “aanxtënich" kerechent is.

Anere aspëkte fon tëm xtuutium aarea is ti unerxiit im leewe fon te fraae weche te rase, ekonoomixe status, sosiaale status un anere ferxiitne aspëkte fon te keselxaft.
Klik tas, mit tëne korajoose fraae sayn xtuutium un aarwat, tas leewe fer ti kanse fraae uf te wëlt sich imer ferpesert, un mit tëm, tas leewe fon te kanse familye, kemaynte un natsioone.

Xeene kruus aus Thee Walt - Santa Maria do Herval, RS

*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI und Kolumnistin bei www.brasilalemanha.com.br. E-Mail: equipehunsrik@gmail.com



Comentários

Participe! Aqui sua opinião vale muito.


  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2020 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia