Colunistas

31/01/2019

Important Pesuuch fon Taytxlant - von Solange Hamester Johann*

In oktoower 2017, sin meyer mit en krupe fon jenealojiste noo São Wendelino hiin kefaar, uf tas Khërep Fest, ekstra fer Klaus Lauck khëne lërne.

 Tan hon mer tëm informeyert meyer teere noo Taytxlant fliye im neekste april, un tee hot aankepot:
--Soo lang wii teyer im Saarland playpt, tuun ich aych hiin faare woo teyer hiin wolt. Ich hon kefroot: - Ërnst¿
Foriches yoer, in feepruer 2018, hon meyer iim aan keruuf un saate tëm meyer khënte noo Saarland khome, un klaych hot eyer sich ankepot fer uns ap hoole khome in Sarreguemines –FR.

Am 14april, waar ti Puch Mese in Sarreguemines, un unser naye froynt Klaus Lauck khomt fon Sankt Wendel, Taytxlant uns ap hoole fer tëne iire Lantkreis pesuuche, un hot uns iwer tray taache iweraal hiin kefaar un noch, hot kontakt kemach mit layt woo kexichte hate fer se fertseele iwer unser auswanerer familye.

Tas waar en wunerlich xeen tsayt, meyer hon fiile plets un xtet pesuucht, un aach phaar xtet fon woo unser foerkhomer heyer sin. Eyer is aankextelt fon te rechiirung fom Lantkreis. Is en kans hërliche un froyntliche mënx.

Yets tii woch, kriin meyer ti important pesuuch fon Taytxlant: Klaus Lauck, woo xon lange yoore tswixe São Wendelino un Sankt Wendel - im Saarland ferpintung kemach hot un yets hot eyer tas selwiche kemach mit Alto Feliz un Tholey, aach fom Lantkreis Skt.Wendel. En komitiif fon Alto Feliz waar foriches yoer noo Taytxlant kereest fer ti tokumënte unertsaychne un yets khomt en komitiif fon Tholey hier unser rechioon pesuuche fer tee pesuuch tsurik kewe.

Ich selepst, mit froynte jenealojiste, tuun Hër Lauck am 02feepruer - samstach uf nëme, en runtfaart mache fer histooriche plets pesuuche, mit tëm mitach ese un tan, noo mitach, en fersamlung hale fer iwich unser inwanerer kexichte en foerxtelung mache im Museu Visconde de São Leopoldo. Eyer playpt pis montachs hier im Vale do Sinos, wën meyer en tan ruf no Alto Feliz faare tuun, un tort trefe mer te krupe fon taytxlëner woo khomt fer seks taache en riisiche rayche prokram mit te Prefektuer fon te xtat Alto Feliz mit hale, mit festlichkheete un seremonie fer ti froyntxaft unich te tswaay xtet se fayre, un tort khëne mer tan noch mool froynte fon triwer aach witer pekeechne.

Xeene kruus aus Thee Walt.


*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com 
Audio dieses Kommentars –AHAI bl 04



Comentários

Participe! Aqui sua opinião vale muito.


  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2019 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia