Colunistas

23/10/2019

Hofnungs Wërter - von Solange Hamester Johann*

Tii woch waar ich mit pus uf em weech, un en yung fraa, woo uf en plats xaft woo se aler sorte mënxe heyert un siit, saat mich tas se laytich weyer soo fiil xlechtichkheet un ximplich tings se siin,

tas se hofnungs loos weyer fon te mënxheet un fon te welt.

Tan hon ich tëm fertseelt tas, in keeche tayl, ich mich aarich kliklich fiile teet, wayl ich xon fiil elter sin wii sii un het iwer tas kanse leewe imer ploos kuute layt aan ketrof, eerliche layt, layt woo fiil xafe, pleen am mache fer te futur, mit te khiner sich am khimere, mit te umwelt, usw.

Tan saat ich tëm aach, sii solt ti welt kreeser aan kuke, net ploos uf tëm plats woo sii xafe tuut, tas es noch fiil kuute layt kept, un tas ich klaawe tas ti kuute mënxe ti meyrxte sin, wayl
-fer yeete persoon woo saat tas ales xlechter wërt, kept es 100 phaare woo pleene khiner uf ti welt pringe;
-fer yeete korupte kept es 8.000 mënxe woo pluut kewe im hospital;
-soo lang woo phaar layt ti umwelt fernichte, kewe 98% fon te aluminium plechyer im Brasil xon resikleyert;
-in te Internet hat tas wort LIEBE mee resultaate als tas wort pang;
-fer yeete mauer uf te welt, kewe 200.000 tapete foer ti tier keleet woo truf kexrip is “Wilkhom”;
-In te tsayt woo en sientist 1 noy keweyer pleent, mache 1milioon motere xokolate khuuche.

Ti Hofnung kept tich flite un te klaawe macht tas tuu tii net ferliere tuust.

Tas tich nii te weech feele sol woo tich fiert, ti kraft woo tich aan heept,
te liipe woo tich humanisiert un te kewise woo tich ekiliiprium kept.

Es kept uersach fer se klaawe. Ti kuute layt sin ti meyerxte.
Ich klaawe an ti kraft fom kuutes!

Ich winxe tas teyer, liiwe heerer, kuutes wipriere tuut, un ploos im KUUTES !!!

Tan hot se mich en khus kep, hot kesaat tas ich sayne taach hërlicher kemach het
un tas se too triwer sich iwerleye teet, un ich antwort tëm tas ales wayter keet im
Hërkot sayne wile!!!

Xeene kruus aus Thee Walt.


*Solange Hamester Johann
ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com 
Audio dieses Kommentars –AHAI bl 04





Comentários

Participe! Aqui sua opinião vale muito.


  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2019 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia

Publicidade