Haymat, Liipe un Rexpekt - von Solange Hamester Johann*

Haymat: aus em lataynix "Patriot" = faterliches lant, tsaycht tas lant woos tuu kepoer kep waarst ore atotiif lant fon en mënx, woo mer sich aan hëngt weche weyerte, kexichte, afektiife un kulturale ferpintunge. Te eyerxte histoorixe rejister fom wort "Haymat" hat mit lant se tuun

Patriotismus: Tas wort petayt te Liipe un Rexpekt woo mer fer unser Haymat hat. Tee Patriotismus khan sich torich te weyert woo mer kept fer ti Kultur fom Lant, sayn Natuer xeenheete un sayn natsionaale simpoole manifesteere: ti Faane, Hymne, usw.

Meyer leewe im Brasil un waare xtols too truf! Kuut xpreche iwer unser Lant, unser Faan tefenteere, unser natsioon un sayn simpoole, sayn weyerte.
Awer es is net tas was meyer in unser Lant siin. Ti teskonstruktsioon fon te krunt weyerte fon te keselxaft, ti teskonstruktsioon fon te familye, ti apweyertung fon te xuule un fon te leerers, woo net mool leerer kenënt kewe. Yets kewe se "piltungs aarwater" kenënt, un tiine ploos noch als fuus lumpe ore als en persoon fer ti khiner petiine, yemant woo ti khiner uf nëmt ore tii woo se tsiye tuun anxtat iire eltre.

Ti iwer peweyertung fom selpstsucht ore tas ekotsentrix sin un te hooche weyert woo hayt tsuu taach kep wërt fer unser fiisixe aus siin, hat ti kayste xwecher kemach un aus em richtich weech kefiert te uf pau fon xtarke mënxe mit minimal tefinierte un nustliche opjektiife fer ti keselxaft, woo en xtarek Lant pilte tuut.

Yeete taach heyert mer xlechte naychkheete in te tsaytunge un mer wees kaar net mee woo hiin. Soo langsam is unser natsioon niter keris kep, un meyer hon tas opserweyert un niks kemach. Fiile hon mit keholef in tëm heslich aarwat.

Un yets¿¿¿¿¿ Yaa…. Yets mise meyer, woo tënke teere uns in en khorekt leewe fiire, ti xliwre samer refe un mit te kleene khiner frix aanfange in lërne was richtich is, was eerlich is, was khorekt is, fer unser HAYMAT LANT noch mool samer kleewe, wii in te kexicht fon te xiltkrot, woo sich ferproch hot un tan hon tëm sayn froynte tëm sayn xaal noch mool samer keflikt .

Unser xeen un kroos natsioon is unser mii weyert: en peser plats fer unser khiner noch mool uf paue, en peser plats fer uns selwer, woo es kanse leewe kexaft hon un yets ruue wolte, es leewe pisye laychter mache… meyer khëne un mise helfe unser flicht un aarwat wayter hale fer unser nookhomer. Tii sin tas weyert.
Xeene kruus aus Thee Walt.


*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com