Colunistas

14/09/2018

Farroupilha Moonat un ti Tratitsioon - von Solange Hamester Johann*

Mit umkefeyer 3,5 CTGs in yeete Munisip, kept es im Rio Grande do Sul 1.731 CTGs fer 497 kemaynte. Im rest fom Brasil kept es mee wii 1.103 entiteete in 23 xtaate, was en total fon 2.834 fon tëne inrichtunge kept im kanse Brasil.

Te Gaúcho Tratitsionalismus kept fon sayn mitkliiter aan kesiin als ti kreest populaar kultur peweechung fon te welt. Tas hot se tuun mit tswaay milioone mënxe woo an te Gaúcho Tratitsioon Mowimënt – MTG inkexrip sin, en inrichtung woo fersuucht ti Gaúcho Kultur in en histoorix un kultural ërepxaft fon te mënxheet se mache, als referëns fer te xuts fon te Gaúcho Tratitsioone. Te protses hot xon aankefang pay te UNESCO un te Dossiê kept uner te laytung fom prasiliaanixe Kultur Ministërium orienteyert.

Ti Gaúcho Kultur is pekhant weche tans, musik, ese un kewoonheete, was fer tii woo im Rio Grande do Sul leewe un fer ti auskewanerte, en kwel fon xtols is. Un wën se en gaita um sich rom hon, tan tuut tas hërts xon anerxter klope. Ti musik fom Rio Grande do Sul halt ti saale fol mit lange rek, hals ticher, hiit, xtiwle un xpoore.

Awer, fer ti Unesco mus tas tiif unersucht kewe fer se pewayse tas tii kewoonheete tayl sin fon en kultural ërepxaft. Ti aychent kraft fon te CTGs im Brasil tsaycht tas es en protukt mit kroos macht is, wën mer siit mee wii 2.800 entiteete am xafe fer ti Kultur im kanse Brasil reprotutseere, un sokaar im auslant. Es kept khee anere payxpiil mit soo en kraft uf te kans welt.

Ti referëns fon te Unesco petayt en internatsionaal erkhënung fon te importans fon te aarwat woo im Rio Grande do Sul kemach kep waar un imer noch wayter kemach kept, sayn Kultur als referëns fer anere natsioone tsayche, woo aach sayn Kultur preserweere mise, un tuun tan ti prasiliaanix eksperiëns penutse, kopiere un praktiseere.

Es is en kesunt kultur, woo fon te wortsle khomt. Ti yunge lërne sich fer ti keselxaft opfere un fer sayn neekste.
Xeene kruus aus Thee Walt.

*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com 
Audio dieses Kommentars –AHAI bl 04



Comentários

Participe! Aqui sua opinião vale muito.


  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2018 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia