26ª Simposium 2018 in te Bosener Mill - von Solange Hamester Jochann*

In te internet, uf te site fom Bosener Gruppe, khan mer tee thekst leese,woo ich fer aych iwersets hon, kexrip kep fon Dra. Martina Scheer:

“Am 01 maay hot te 26ª Tialekt Simposium in te Bosener Miil, pay xtraalente plaue himel aan kefang, awer in winterliche temperatuure. Torich inlaatung fom Lant Kreis St. Wendel un uner co-orkanisatsioon fon SR3, ti Saarlandwelle, hon Dra. Martina Scheer fon te Tourist-Information Sankt Wendeler Lant un Susanne Wachs fon te SR3 ti ausergewoonliche autoore ap kehool.

Ausergewoonlich wayl een autoorin fon 13.000 khilomeeter wayt wech aan kereest waar, fer an tëm Simposium mit hale. Solange Hamester Johann is aus Brasil khom, kenauer kesaat aus Santa Maria do Herval, in Rio Grande do Sul, an te Bostalsee. In sayne haymat xpreche noch tray milioone mënxe “Hunsrik- Plat” un sii is en engajiert forterin fon sayn moter xprooch, tii woo fon te UNESCO als aychne xprooch in Siit Amëërika erkhënt kep is.

Kraat soo interesant sin ti anere autoore, woo aus Frankraych als kast khom sin: Elvis Stengel aus Lothringen xaft aychentlich mit bioakrikultur, awer toch sayn hërts xlaat fer ti literatur un tas singer, mit liiter in “Ditsch”, sayn moter xprooch. Peklaytet fon sayn tochter Céline uf em klawier, singt un resitiert er sayn thekste kans kefiil fol.

Aus em Elssas, te weteraan un liiter macher Jean Pierre Schlagg is wayt iwer ti krënse fon sayne haymat hinaus pekhant, net ploos als liiter macher, sonst aach als singer un theaater xpiiler. Mit sayn Band macht er Country-Musik uf elsäsix un singt liiter mit thekste in sayn moter xprooch – unser taytx.

Te Saarlënter Johannes Lapré, aus Bexbach, khont noch mool aan fange se singe eyerxt wii eyer sich aposenteyert hat in sayn profisioon. Als singer un liiter macher hot Lapré im Juni 2017 sayne eyrexte tialekt album “Saar-Pälzisch” puplitseyet. Awer, tefoer hat er xon CDs in ënglix un standart taytx raus kep kehat. Tee konsul fom Saarland xaft mit kans perseenliche theeme, wii ti hochtsayt fon sayn tochter, sayne intrit in ti “ruue xtant” ore hëmwee.

Wunerlich waar tas mënxe woo soo wayt wech ëne fom anere leewe, sich in unser xprooch unerhale khëne! Un soo is aach fiil fertseelt kep, un iwer ales aach kelacht un froyntxafte kexlos kep.

Yeete moynt, um 9h hon mer uns ketrof in te Bosener Miil tsum kemeensame khafi trinke. Tepay hot Susanne Wachs eene fon te taylneemer foer kextelt im saarbrücker raatio. Un en interwiew “ao vivo” in te SR3 is aach noo mitach kemach kep, tas ti

autoore fon sayn aarwat xpreche khonte. Martina Scheer hot fer ti autoore fiile importante plets fom Sankt Wendeler Lant ketsaycht, wii te kheltixe (celtas) Ringwall in te xtat Otzenhausen. Jean-Pierre Schlagg hot iwer te aanxtrëngente kang kesaat tas er “sayn halep lung ferloer” hat përich ruf .

Te Lantraat Udo Recktenwald hot ti kaste ap kehool im Historixe Fersamlungs Saal fom Lantkreis. Er saat wii important tee Simposium is fer ti kultur im Sankt Wendeler Lant un tii autoore hon iim peloop un petankt fer sayn kroos khimerung um unser xprooch un kultur.

Fraytachs ooments hot Susanne Wachs mit te poëte, singer un xraywer pay iir im Prokram “Pay uns Tehëm“ “ao vivo” 2 xtune interwiews kemach in Saarbrücken, un tii khonte sayn musik xpiile , un thekste leese.

Tan is es noch mool interesant kep an te apxlus presentatsioon, am samstach ooment, 05maay, in te Bosener Miil. Etwa hunert pesucher khonte xeene musike un thekste heere in sayn moter xprooch. Tepay khomt noch en xpetsieele kast: Didier Sustrac, en famoose singer fon Paris, woo im Saarlant rom sich presenteere teet, torich inlaatung fon Susanne Wachs. Er hot mit sayn kitare prasilianixe pekhante musike kexpiilt un Solange Hamester Johann hot iire thekste too truf in sayn moter xprooch aus kesaat.

Es waar en ekstra xeene ooment kewees, mit kroos wariatsioon in te presentatsioone, weche was ti autoore “Standing Ovations” fertiint hon.”

Xeene kruus aus Thee Walt.


*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com