Colunistas

25/01/2019

1000 Picher fon te Kesets fon Unser Moter Xprooch - Solange Hamester Johann*, fom Proyekt Hunsrik

In akust 2011 hon meyer torich em Teputaate Joao Fischer-Fixinha ferlangt, un iwer en kans yoer hot tee traan kexaft mit sayne aarwats thiim fer torich se fiire in ale komisioone fon te xtaat khamer, un imer is es 100% aproweyert kep.

In yuuli 2012, hot te Kowerneyer ti Kesets n.14.061, fom Xtaat RS unertsaychent, tii woo unser xprooch in Histoorich un Kultural Ërepxaft transformeyert. Ti Xtaat Khamer ore Assembléia Legislativa hot aach erlaupnis kep fer 1000 picher puplitseere iwer ti kexichte fon unser xermaanix folek, iwer unser Proyekt Hunsrik-Plat Taytx un iwer ti kesets.

Meyer hon tas puch aylich prepareyert tas es fërtich keept fer ti Puch Mese ore Feira do Livro fon Porto Alegre in tëm yoer. Too truf hon mer 6 yoer kexaft mit tëm kleen puch uf fiile puch mese in te rechioon un sokaar uf fier puch mese in auslant, woo ich aych xon fertseelt hat, in Sarreguemines-FR un uf en Seminaar fer xutënte woo sayn Master Aarwat am mache sin in te Linkwistik Uniwersiteet Wien, in Eesteraych, woo te Professor Manfred un Professor Mateusz Maselko tas penutse in sayn xuule, in Wien un Genebra-Xwitserlant.

In 2015, 2016 un 2017 hon mer oft iwich unser kesets kexproch mit tëm puch, fer raatios un tsaytunge fon Elsass un Lothringen, sokaar fer leerer, layt woo mit kultur xafe, picher xraywer, usw., aach in Frankraych un Taytxlant.

Yets, tii woch, sin meyer kans kans froo kep, wayl meyer hate foriches yoer ferlangt kehat fer te Teputaate meyer praychte noch mool ti picher truke lose wayl meyer se xon al aus ketaylt hate, un ti letste taache hot eyer uns en mensajeyer kexikt mit noch 1000 picher fon te Kesets. Tas is en ekselënt naychkheet fer te Proyekt, wayl meyer wayter Seminaare hale fer leerine un tas is en importante material fer too traan se xafe.

In feepruer priinge meyer aych noch anere fiile naychkheete fom Proyekt Hunsrik-Plat Taytx, was uns kans xtols mache tuut.


*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com 
Audio dieses Kommentars –AHAI bl 04



Comentários

Participe! Aqui sua opinião vale muito.


  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2019 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia