Colunistas

12/06/2014

matéria de: Solange Hamester Johann

Proyëkt Hunsrik 1036

Pesuuch fon en xermaanxe Jornalist/Pesquisador

HUNSRIK 1036
Haloo, hier is Solange Hamester Johann, fom proyëkt Hunsrik
PESUUCH FON EN XERMAANIXE JORNALIST/PESQUISADOR
Tii woch hate mer en aarich important pesuuch kriit.
Ekrem Eddy Güzéldere, woo xon 7 yoer in Istambul-Turquia woont un xaft
fer ti tsaytung Zeit.Hamburg, is uns uf suuche khom fer en reportaaj se
mache iwich te Proyëkt Hunsrik.
Er is tswaay taache pay uns keplip. Ich un Mabel hon tëm ti aarwat fon
unser 10 yeeriche Proyëkt presentëyert un tëm noo sin mer mit em Prefëkt
en entrevista mache kang, wayl tee petiint noch umkefëyer 90% fon sayn
folek in te Hunsrik Xprooch un xraypt, yeetes yoer, in te lëtxte 30 yoer, en
theaater xtik un macht ti ufxtëlung in sayn kemaynte mit te nachparx layt.
Tëm noo, sin mer en xuul pesuuche kang, wayl te jornalist wolt mit
xprëchënte khiner fertseele. Hot aach mit te leerine kexproch. Un tan sin
mer noch anere layt pesuuche kang, mit weem er sëlëpst taytx xprëche
wolt.
Un, tsum lëtste, hon mer en kuut mitach ëse mit kartofel khichëlcher uf
ketixt.
Too hon ich tëm kefroot was er mënt iwich ti tswaay taache woo er pay uns
keplip is.
Er hot keantwort tas er ketënkt hat mer wolte en xprooch proyëkt in sëtse
hii in te rechioon, awer er hët sich xtarek ferwunert tas unser 1º xprooch
wërklich noch te hunsrik is. Tas mëyer wërklich tas ploos mit te khiner
wayter hale mise, un soo unser kultur kraat soo xtarek wayter leewent
playwe khan in te kanse taytxe kholonie fom Brasil.
Awer mëyer mise uns tumle, sonst keet tas xnël tsurik.
Santa Maria do Herval hot xon sayne foer xrit ketuun un halt xon xuul fer ti
khiner pis 5º klas, tsayt 2011.
Wan fangt ayre munisip aan?
Ti prasiliaanixe kesëtse këwe xon erlaupnis fer tas se mache tsayt 1996.
Xeene kruus aus Thee Walt.

Download do arquivo de áudio

  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2019 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia

Publicidade