Colunistas

30/07/2014

matéria de: Solange Hamester Johann

HUNSRIK 1043

Haloo, hier is Solange Hamester Johann, fom Proyëkt Hunsrik.
EN IMPORTANT PESUUCH FON FRANKRAYCH
Tsayt am 06 yuuli waar hier pay uns en pesuuch aan khom wëche unser
Proyëkt Hunsrik: te theaater ator LAURENT BARTHEL, woo in Lothringe
ore Xtaat Lorena im Frankraych, kepoer këp waar, ticht an te krëns fon
Taytxlant.
Tee xpiilt theaater als peruuf, awer ploos in Hunsrik Xprooch ore PLATT,
woo ti layt fon tëm sayne xtaat al reete, soo wii ti pewooner fom xtaat Ëlsas
ore Alsácia, aach im Frankraych. In Taytxlant, wërt unser xprooch in te
xtaate Saarland un Rheinland-Pfalz kexproch. Im Lant Luxemburgo wërt
unser xprooch als haupst xprooch ore moter xprooch kereet.
Laurent hot uns fertseelt tas ale kepot en festiwaal ore anere aktiwiteete
paseere wëche tëne iire xprooch, woo aach unser xprooch is, in tëne fier
xtaate fon tee tswaay natsioone.
Tas hot uns fiile itee këp, fer hier aach aanfange ëtwas se mache fer ti layt
se fersamle, wii jornaliste, picher xraywer, ratialiste, iwersëtser, ketichter,
mooler un artiste, musikante, leerer, kenealojiste un histoorixe kexichts
xraywer, xuule un uniwersiteete un anere profisionaale un persoone woo
sich an te xprooch intërëseere un, tan, tii woch, hon mer aach en inlaatung
kriit fer mit hale in eene fon tëne festiwaale, am neekste yoer in april, woo
te theema iwich ti auswanerung noo Siit Amëërika peaarwat këwe sol.
Tëswëche, tuut tas sich kraat an unser Proyëkt aan pase.
Tee unser fransoose froynt is pis am ën fom moonat too keplip un hot phaar
theaater foerxtëlunge in unser kemaynte un xuule fer unser “190 Yoer
Inwanerung” se fayre kemach, sokaar am 25 yuuli, an unser haupst
“Kholoniste Fëst”.
Te Proyëkt Hunsrik hot tëm aach phaar foerxtëlunge in te nachparx xtët
orkanisëyert, wii in Ivoti, Dois Irmãos un São Sebastião do Caí.
Mëyer sin aarich froo mit tëm kulturale intercambio, wayl tas macht uns
imer raycher in khëntnise un froyntxaft.
Xeene kruus aus Thee Walt

Download do arquivo de áudio

  • brasilalemanha
  • brasilalemanha
  • brasilalemanha
  • brasilalemanha
Logomarca oficial da imigração alemã no Brasil. Reprodução liberada e recomendada, para uso não comercial.
Para uso comercial e originais em alta resolução: contato@brasilalemanha.com.br.

© 2004-2019 BrasilAlemanha - O portal oficial da imigração alemã no Brasil - Todos os direitos reservados

Desenvolvido por Sapiência Tecnologia