matéria de: Solange Hamester Johann
Hunsrik 1030 - Welts Aarwat Taach
Haloo, hier is Solange Hamester Johann, fom Proyëkt Hunsrik.
Es këpt taache woo mer uf xtayt, fol mit enerjii un 24 xtune sin nët kenuuch fer ales se mache woo mer uns foer hoole. Un tan xpiiert mer tas ales te wëyert is un tas mer nët fer niks uf te wëlt sin. Tas mer en misioon foer hon, perseenlich un profisioneel, woo uns uersach këpt fer se tënke: Ich sin es pëste am mache! Tee woo sayn flichte mit liipe un hiin këpung tuut, keet kuut in sayn aarwat. Awer noch pëser keet es tëm woo xaft mit en lëchlich kesicht. Unser aarwat këpt uns tas proot woo mer yeete tach ëse, awer mit frayt xafe, këpt tëm proot en pësere kexmak. Mëyer al, woo laafe fer uf te khamp fom leewe khome, mit unser unerxiite un tiwërsiteete, mit te hant am pluuch ore hak, an te khuuchel xraywer, am pisturii ore aach te fray aarwater, al tuun ikaal xafe. Te man ore fraa, woo mit eerlichkheet xaft, fertiint sayne wëyert, sayn aanxtënichkheet. Mëyer al mise xafe, fon khint uf pis te lëtxte phunkt fon unser leewe. Ales was mer mache ore uf paue is, ëntlich, en aarwat. En aarwat karanteere is, manich mool, en xwiiriche ufkaape, woo koraaj, hiin kepung un tëknik foerperaytung ferlangt, soo wii eerlichkheet un emotsionaal klaychmoos. Wëyer en aarwat hot mus se liipe un sayne kuute wile hiin këwe, nët ploos fer ales richtich mache, awer fer sayne hileffer te mënxheet sayne fortxrit aach tepay këwe. Keseechent sin ti hënt woo xafe. Mëyer winxe tas ti justis in te aarwats kexichte uf te kans wëlt foer keen khëne, wii Hërkot es wil hon un winxe noch tas unser Hër ti kanse aarwate seechne un xitse tuut. Xeene kruus aus Thee Walt.
© 2004-2024 BrasilAlemanha - O portal oficial da imigração alemã no Brasil - Todos os direitos reservados
Desenvolvido por Sapiência Tecnologia