Solitariteet khomt tsum foerxayn iwer ti kriise fom Coronavírus - von Solangela Hamester Johann*

Tsayt phaar moonate heyer, siit ti welt imer mee naychkheete iwer te foerxrit fom Coronavirus. Tas is noch mee ins kexpreech khom tsayt am 11mërts, wan ti Welt Kesuntheets Organisation (OMS) te theema als Pandemie aan kesaat hot.

Awer, unich al tii nekatiife propleeme fon tëm klopaale forterung, kept es toch fiile positiife inisiatiife, woo net ploos tas folek, awer aach te finansial market un ti intustrii helfe wayter keen uf em peste weech keeche ti phest.

Too triwer uns am iwerleye, hon ich en liste kemach mit phaar aktsioone woo ti kwarenteena tsayt fer tas folek laychter mache khan un ti nekatiife efekte fon te kriise tsayt ferweenicher khan fer ti firmas:

1. Ti Ambev protutseyert gel alkohool anxtat pier: is 50.000 liter alkohool gel am mache, fer se xënke fer puplike kranke hayser fon São Paulo, Rio de Janeiro un Brasília, woo ti mayste fel fom Coronavirus sich konsentreere un hot noch anere firmas inkelaat fer tas selwiche mache, un tswaay hon ti forterung aankenom, un sin 36.000 liter alcohool gel yeete am protutseere un tuun tas aach xënke fer ti xtaate woo se instaleyert sin. Sokaar unser kleene artesanal pier fabrike sin tas aach am mache hier in te rechioon;

2. Im Herval-Krupe, in sayn fabrik fon Dois Irmãos, hon se xërtse, hospital yake un maske keneet,fer se xënke fer kranke hayser woo mit te infitsierte fom virus xafe;
3. En faprik fon sicherhayts ekipamënte, im west Santa Catarina, is maske mit wisier am protutseere, fer ti sicherheet fon toktre un kranke xwestre se karanteere, tii woo am front xteen fon te pekhëmpfung fom vírus;

4. In Biguaçu, kroos Florianópolis, xteen krupe fon froynte am rant fon te BR 101 un fertayle ese ore marmitas fer kaminyonge xofeere woo niks ans feele khome lose wole, wayl ti restaurante tsuu sin;

5. Meerer fuuspaal thiime sin sayn inrichtungen am an piite, fer in noot fal kranke hayser transformeere;
6. Ekselëns kranke hayser in te xtaate Baden-Württenberg un Rheinland-Pfalz sin xweere kranke pasiënte aus te xtaate Elsass un Lothringen-Frankraych - woo ti epitemii aarich kewaltich is, am aan nëme, wayl se fray plats hon fer ti layt in sayn UTIs .

Ploos phaar payxpiile fer ti fiile positiife aktiwiteete woo uf te kans welt am paseere sin un tii es uns meechlich mache se peopachte tas ti mënxheet net kraat kans aus te spiritual richtung keet, torich sayn solitariteet un soriche um sayn priiter am manifesteere sin.

Tas macht uns aarich froo un sokaar konsoleyert, se wise tas mënxe in xwiiriche momënte solitariteet aus iipe, was en akt fon kuutheet un ferxtëntnis mit unser neekste tsaycht. Tsaycht aach en kefiil, en fereenichung fon interese ore itentiteet fon sentimënte. Kans xeen, kël?
Xeene kruus aus Thee Walt.