05 yuuni - Internatsional Umwelts Taach - von Solange Hamester Johann*

Yeetes yoer, is tee taach en xtarek plataform fer ti layt, kemaynte un rechiirunge uf te kans welt se fortere fer se reajiire iwer ti Umwelts propleeme fom Planet.

Ti natsioone un meyer al mise uns too truf prepareere , fer ti kompromise fer ti erhalung un restaureerung fon ter piotiwersiteet se erfile un tepay ti keleechenheet aan piite fer te aanfang fon te Tëkate fon te ONU fer ti Restaureerung fom Ekosysteem, kepleent fer 2021 pis 2030.

Te opjektiif is ti tekratierte un kexteyerter ekosisteeme masiif restaureere, fer ti klima kriise se pekhëmfe un ti erneerungs sicherheet, ti waser fersorichung un ti piolokix tiwersiteet se ferpesere.

Meyer xteen hayt foer en important forterung fer aktsioone tsiye fer te kliima un ti erhalung fon te piolookix tiwersiteet, was tswaay sayte fom te selwich metalye sin. Meyer mise stratëëjie enteke fer tas aus xtërwe fon planse un tiire sorte xtil hale mache khëne.

Tëm noo ti Inter Xtaatlich Plataform fer Piotiwersiteet un Ekosisteem, in projektsioone woo foriches yoer puplitseyert kep sin, kept ketsayt tas mer filaycht net an ti opjektiife khome keeche ti aarmut, hunger, kesuntheet, ferprauch un protuktsioon fon es mitel, waser, klima, otseaane, lant un xtet.

Yeetes yoer nëme mee wii 150 natsioone tayl in te prokramatsioon woo fom Umwelts Prokram fon te ONU orkanisiert kept. Kroose firmas, orkanisatsioons kemaynte un rechiirunge aus te kans welt setse te marke “Umswelts Taach” in, fer ti umwelts uersache se tefenteere.

Tesweche is tee taach te haupt instrumënt fon te ONU, fer uf te kans welt pekhant mache un aktsioone fer ti Umwelt se fortere. Tas paseyert tsayt 1974 un is aach en important plataform fer foer xrite in te Umwelt timensioone se fortere.
Wole meyer aach mit unser froynte in te Internet, mit unser xtutënte, in unsere kemaynte un munisipe mit helfe? Wën mer an ale niiwels hiin khome, khëne mer ti welt um uns rum influensieere - unsere aychne Umwelt.

Xeene kruus aus Thee Walt.